Ita ruz ita šah ki xəili tama`kar bu fərman bəda ki har kəs, har qədr səkkə dare, bavəre šahi xəzaney-a tahvil bəde o alavə bukud ki agə ruzi ane ma`muran har kəs ə virja ita sakkə biyafid, dastur dihe un-a bukušid. Xəili zud , šahi xəzane sakke ja pura bost o šah mutmaen bubost ke ane molke durun hikas nəysa ki hatta ita sakkə bədare

šah je bas ki tama`kar bu, ba`de moddati xu jarciana ge : jar bəzənid ki har kəs ita səkkə   padəšah re bavəre, padəšah xu kor-a, un-a fade

Ita kəl bu ki moddətha, šah ə kor-a tənxa buboste bu. Kəl, xu pir ə mar-a xaye ki ita səkkə xodəš-a fade .pir ə zan ge : pəsər jan, səkkə koya naha! Har kəs har ci dašt une ja figiftid. Man ki haf asman ə durun ita sətarə ham narəm. To ham ki bikar o bi a`ri, šah ə kor-a xayi ci kar?. xulase xəili una nasihat kune ki dəs je a karan usane. Amma Kəl je bas israr kune , mar ə dil be rahm aye o ge : zay jan, man ki səkkə naram amma vəxti ti per ə xuda biymurz-a xak kudan dəbam, vasiyat bukude bu ita sakkə anə cumə sər bənəm. Man ham a kar-a bukudəm. Tani ti per ə qəbr-a bəkani o səkkə-ya usani

Kəl, dəs be kar bubost. šabi je šaban , xu bicarə per ə qabr-a kane o səkkə-ya xu per ə cum ə sar usane o šadi kunan bəre šah virja. šah ki haris o tama`kar bu , na fəqət xu kor-a un-a fanda, balki kəl-a bə jormə nafərmani o sarpici je xu fərman, tavade quldane durun

Kəl živir kəše o dad o fəryad rah tavade ki:  hazrate sultan ! šuma jar bəzeid, mən a sakkə bə dəs avərdəne re, mi per-a gur bə gur bukudam, hasə va šimi kor-a mər-a fadid. šah ge: agə bigi ki a sakkə, koya nəha bu o cutor an-a bə das bavərdi mi kor-a təra fadam. Kəl dastan-a ta`rif kune o tama`kar ə padəšah, dəstur dihe təmamə qabrəstanian ə xak-a bəkanid, balki kəl ə per ə manestan, baxi murdəgane cum ə sər ham sakkə bəmane

***** 

Gutan kas : Ahmadə Pur Ahmad . 68 salə . səvaddar. Raštə šin ** Dəcin-vacin gudən o Vəgərdonen farsi votə ji : Durək

C = ch  * š = sh * ž = zh * x = kh * ə = ita səda bəynə “A” o “E” ə miyan * u = oo *